Avis ai letor

Nòst diretor e fondator d' "Assion Piemontèisa", Beppe Burzio, a l'ha lassane 'l 6 ëd fërvé ëd cost ann, ch'a fa des d'Assion Piemontèisa. La manera pì giusta për arcordé 'n giornalista e në scritor a l'é cola, i chërdoma, dë smon-e ai letor na cita sernia dij sò tòch pì significativ.

Costa a l'é l'ardità che Beppe a lassa al Piemont e a soa gent.

Ës nùmer d'A.P. a l'é diferent për vàire rason. I surtoma con un nùmer ùnich për ij meis ëd Fërvé e 'd Mars.

Con la perdita 'd nòst diretor e pressident ëd la Coperativa, la regolarità e la continuassion d'ës giornal a dipendran da j'angagg ch'a voran pijesse coj ch'a saran ij neuv promotor ëd costa publicassion, visadì NA NEUVA CA EDITRIS, un neuv diretor, j'articolista ch'a seguiteran a vorej-je scrive 'nsima e, possibilment ëd neuv ch'a veulo ancaminesse an cola ch'a sara la sconda aventura d'Assion Piemontèisa.

Tuti coj ch'a son anteressà o ch'a veulo dé 'd sugeriment costrutiv a peulo butesse an contat con la coperativa, opura con qualsëssìa dij giornalista d'A.P.

Arlongh dël di al numer 011/7710595 a rëspondrà la secretarìa telefònica e i sareve arciamà.

A.P.