Sté alegher!

A-i é 'l "robot" e vòsti problema an merit a la goerna dij vòsti vej, magara nen pì tant an salute, a son arzolvù.

Che bel, an Giapon, a l'han anventà na "badante-robot", fin-a grassiosa, ch'a parla (grassie a 'n vocabolari 'd 10.000 paròle), a l'ha j'euj, as dësgagia an tuti ij travaj domestich e a l'é fin-a programà për fé prende, a temp e ora, le meisin-e al vejòto o a la vejòta ch'a deuv goerné, a në contròla le condission ëd salute e a proved a ciamé ij famijar o l'ospidal an cas d'emergensa.
Ël compagn ideal për tuti ij vej ch'a vivo soj.
L'ansian, a diso, as sent cudì e sodisfàit e s'a veul, a peul adritura butesse an contat "audiovideo" con ël mond ch'a viv fòra 'd ca soa.
VËRGÒGNA"!!!!!!!

An-namoresse a comand

A-i é stàje n'avosà psicòlogh american, Robert Epstein, che fra l'àutr a dirigg l'arvista "Psychology Today", che l'ann passà a l'ha diciarà che l'amor a peul esse "construvì a taulin", a sangh frèid.
Con impegn e determinassion tuti a peulo an-namoresse, a basta trové quaidun ch'an piasa tant si pòch e peuj oblighesse a vorèj-je bin.
Lë psicòlogh a l'ha 'dcò verificà soa teorìa con doe "cavie" (òm e fomna) ch'a son praticasse për quat di e a son an-namorasse, n'amor con le ciòche.
Ël bin coma 'n contrat. Mërcansìa ch'as vend e ch'as cata.
É-lo nen forse che cheidun, ancor ancheuj, a l'àbia pì nen car ëd butesse 'nsema a na përson-a për la qual a preuva un sentiment creus ancor anans ëd conòssla bin e a veula prové la "magìa" d'un càmion ch'at passa 'nsima e ch'at lassa sensa fijà e con j'òss rot?
L'amor ës-cet, col ch'at compagna për tuta la vita, e peuj ancora.........
Vaje a capì jë "psychòlogh" dël di d'ancheuj.

Mi i sai nen vojàutri còsa ch'i na pense a propòsit ëd le pelìcole ch'a në smon-o an 'sti ùltim temp ij cìnema, pelìcole ch'a son ëdcò candidà a l' "Oscar".
I stagh nen a contevje tuti, ma ij titoj a parlo già da soj: "Gangs of Newyork" andoa la nassita 'd New York a l'é caraterisà da 'd fàit ëd sangh, sassinagi, parolasse, bote e porcade da l'achit a la fin; "Arcòrd-te 'd mi" andoa la famija "standard" a l'é gnente d'àutr che 'n serpé.
Ant "La stansia dël fieul" i podoma vëdde 'n fieul ch'a l'ha na mare drogà, 'n pare violent e un grand vreman odios.
Ah! Im dësmentiava!
A-i é 'dcò "White Oleander": le dificoltà'd na cita ch'a l'ha na mare al croton për avèj massà sò "moros" e ch'a ven fidà, maniman, a 'd famije che, mincadun-a, a l'ha 'd problema 'd tuta sòrt.
A son pelìcole ch'at fan vnì la veuja dë scapé, 'd seurte e fesse arfonde 'l bijet, për nen ëspërfondé completament ant la nita.


Për ij letor ch'a 'l l'han nen e ch'a veulo avèjlo, i j' proponoma la compra d'un bel lìber ëd poesìe 'd Beppe Burzio dal titol
"Arsivòli & Maciafer"
con an-lustrassion a color, ëstampà ant ël 1990.
A l'é arlegà e a ven ësmonù a 20 Euro (speise dë spedission comprèise).
Cont corent postal ëd la Pro Piemonte Cooperativa: 32696106