|
ËL CANTON ËD NATO RISTORANT CINEIS Un giovnòt, ch'as da d'arie, a va con na fija a sin-a ant un ristorant cinèis. Fasand finta 'd savèj ël cinèis, quand che 'l cambré a j' pòrta 'l menù scrit con j'ideograma, chiel a j' dis: «Antlora... ch'am pòrta sossì!» E a ponta 'l dil an s'na riga dël menù. «Si signòle!» A j' rëspond ël cambré. «E sossì!» «Si signòle!» «E sossì!» «Nò, quello nò, signòle!» «Përchè?» «Quello è il nome del padlone, signòle!» LE VESTIMENTE Un a j' ciama a n'amis: «S'it l'avèisse ses alògg, it ëm na darìe un?» «Ma diav! As capiss!» A j' rëspond l'amis. «E s'it l'avèisse ses cavaj?» «Ma a l'é natural ch'it na darìa un!» «E s'it l'avèisse ses vestimente, 't ëm na darìe un-a?» «Nò!» «E përchè?» «Përchè ses vestimente i j'hai për dabon!» PRESSI ÀUT «Vàire ch'a costa sta plissa?» «Un milion». «Pòrco diav! E cola lì?» «Tre pòrco diav e mes». PARE MISTERIOS An sël treno a-i é na fomna giovo con un bel cit an sij ginoj. An facia a-i é 'n monsù ch'a veul fé 'l gentil: «Oh! S'a l'é bel sto cit. E che bej cavèj ch'a l'ha! Sò papà a deuv avèj ëd sigur ij cavèj ross. A l'é parèj, madamin?» «I lo sai nen. A l'é gnanca gavasse 'l bonet, sto lajan!» EUV FRESCH Un ëd sità as ferma con la vitura davzin a na cassin-a: «Cerea madamin, i l'eve pà d'euv da vende?» «Oh sì ch'i n'oma!» «A son euv dla giornà?» «As capiss! Ëd neuit le galin-e a deurmo». L'ETÀ APEUPRÉ Ël giudes a j' ciama a na madamin convocà coma testimòni: «Vàire ani ch'a l'ha?» «Trantesinch ani». «Ch'a varda bin madmin che chila a l'é sot giurament!» A j' fà 'l giudes. «Disoma - a rëspond chila - trantesinch ani e quaich meis ...» «Vàire meis?» «Sent e vint .....»
|