Ës meis i l'oma arseivù da l'editor Primalpe Costanzo Martini 'l lìber, scrit an italian, "Le confessioni di Padre Ghi" dl'autor Claudio Mondino.

Ël lìber a l'é na longa antervista a Pare Pierin Ghi, S.J., bin conossù a Coni.

Soe celebrassion dël prim vënner dël meis a son ëstàite tramudà da la Cesa dij Gesuita al "Palazzetto dello Sport", për deje la possibilità a tuti dë scoté soa vos.

Pare Ghi as dedica da na part al confòrt dij malavi e da l'àutra al mond dij giovo ch'a serco soa identità. Pare Bartolomé Sòrge an soa prefassion a dis: «... a l'é nen esagerà afermé che al "Palazzeto" as seguita an manera neuva la midema stra d'evangelisassion, conversion e varison anandià da Gesù Crist e sò apòstoj an l'Evangeli»

Ël lìber an compagna a dëscheurve l'òm Pierin Ghi e soa mission e a l'é stàit presentà vënner 7 ëd fërvé a Coni.

I peule trovelo an librarìa a 10 Euro.

-----------

Dal 1° ëd fërvé 'd cost ann a l'ha durbì a Turin, an contrà Garibaldi n. 11 bis/A (fra contrà dij Mercant e contrà San Tomà, a doi pass da piassa Castel, da la Comun-a e dal Dòm) la librarìa

Al moment, e ancor për cheich ësman-a, a l'é mach ëstàita durbìa na cita part ëd soa area 'd vendita (j'àutri salon a son ancor nen pront).

Sta cita part a fonsion-a coma s'a fussa na bela giojera dël negossi ch'a sarà ant l'avnì.

A mandela anans e a dirigg-la a l'é Pàul Siròt.

Ant la librarìa as peulo trovesse, fra l'àutr, tute le produssion (lìber, cd, cassiëtte a bindel àudio e video) dla Librarìa Piemontèisa Editris ëd contrà San Second, ch'a seguiterà an soa atività e a sarà 'dcò potensià ant ij meis a vnì.

L'inaugurassion ufissial an via Garibaldi a sarà fàita ant ël moment ëd l'overtura total dël negòssi, andoa i sareve spetà numeros.