A van giù le lus dël teatro. As duverta ‘l sipari e, antratant, a part la vos ëd Piero Montanaro ch'a canta un-a dle canson pì famose dij Farinei dla Brigna: "Ba ba balengo con l'asienda an falimento...".

La sena ch'as presenta al pùblich a l'é l'intern ëd n'apartament. N'òm ëd mesa età a intra e as campa su na poltrona, dobià dal mal a la schin-a. A sa nen che cost mal a la schin-a, a-j' cangerà la vita ant ël vir ëd doe ore!

Cost a l'é l'achit ëd la neuva comedia dl'Associassion Coltural "Ij Braghèis" ëd Bra, presentà al Teatro Monteròsa 'l 10 e l'11 ëd gené, për la rassëgna "Tut da rije". Doi at, neuv ëd pianta, creà da la "verve" e da la simpatìa 'd Giancarlo Chiesa.

La trama 'd "Ël re dij balengo", cost ël titol ëd la comedia, a l'é tuta giugà su na stòria ch'as dësrola praticament an temp real, ant le doe ore dlë spetacol.

L'editor Luca Bròsio e ij sò amis a l'han na tradission, tut àutr che agradìa da Fransesca, soa fomna: cola 'd fé a scadense fisse na sin-a. Ma nen na sin-a normal. Na sin-a andoa mincadun, na vira un e na vira l'àutr, a deuv angagesse a porté un balengo "doc" për podèj-je rije dapress.

Stavòta la scusa a l'é che 'l balengo an question, ël ragionié dla Cassa 'd Risparm Vincens (Cens për j'amis) Brignòla, a l'é n'ambalinà dël "ricamo a mezzo punto", con ël qual a s'amusa a fé 'd quader ch'a rapresento d'usej.

Luca, donca, a peul pròpi nen perde l'ocasion d'anvitelo a la sin-a con la scusa dë smonje l'oportunità 'd publicheje soe "ciadeuvre" ant un liber fotogràfich. Ma cola sèira, giusta n'ora prima 'd seurte, a resta blocà dal colp ëd la stria sota la dòcia. La sin-a an question, a sàuta, ma Cens a l'e già surtì. da ca soa e a riva l'istess da Luca.

Soa vita a sarà mai pì la midema, për tuti ij pastiss ch'a-j' combinerà ant un virariond irefrenabil e esilarant.

Ël prim temp ëd la comedia a l'é praticament un gieugh a doi tra Luca Bròsio (Giancarlo Chiesa) e Cens Brignòla (n'ecessional Stevo Eirale).

Dacant a lor doi, comsëssìa, a van nen dësmentià j'àutri protagonista dla vicenda. Luciana Provera a l'é Fransesca, la fomna 'd Luca, a l'inissi vitima dle folairà 'd Cens, tant da fela scapé da ca, e peui, a la fin, soa sòcia: Anna Tibaldi ch'a l'ha 'l dobi ròl dl'energica massagiatris Olivia (ch'a serca 'd dësbloché Luca ma con pòchi arzultà) e dla teribil, an soa simpatìa, Artemia Cavalli, antrega ispetris dl'ufissi impòste; Carmine Botti a l'é Vero Rossi, prim òm ëd Fransesca e ex pì car amis ëd Luca, con ël qual, contut, a farà la pas an mes a tut ël bailamme dla sitoassion.

Cristina Costamagna a l'é Michelle, l' "amisa" 'd Luca, belavans l'ùnica a parlé mach an italian, malgré 'l cognòm pì che piemontèis.

Ël pùblich dël Teatro Monteròsa, com'as sa, a l'é 'n pùblich motobin atent e, a giudiché dai batiman ch'a l'ha riservà a tuti ij protagonista, as peul disse che 'l sucess a l'é stàit bin franch.

Ancor na vira, donca, a vanta feje onor a la Companìa Carla S. che ant ël 2003 a festegia ij des ani dla rassëgna.

A la facia 'd chi a dis che 'l teatro piemontèis a esist pì nen.